BENESTAR PON EN MARCHA O III PLAN GALEGO DE ACCIÓN VOLUNTARIA 2011-2014 QUE INCLÚE UN PROGRAMA DE SERVIZO XUVENIL NOVIDOSO EN GALICIA

  • A conselleira de Traballo e Benestar destaca que a nova ferramenta estratéxica servirá para dar resposta á realidade e retos do eido do voluntariado
  • O documento, que foi consultado a máis de 800 entidades do sector, contén 89 accións para executar
  • O Servizo de Voluntariado Xuvenil, que xa está en marcha, é unha plataforma para poñer en contacto ás persoas con vocación voluntaria coas entidades que impulsan este tipo de accións
  • Neste servizo dirixido á mocidade están a participar 25 concellos e 36 entidades e estímase que neste ano se poñan en marcha 5.000 xornadas de actividades voluntarias en toda a comunidade autónoma
  • O III Plan Galego de Acción Voluntaria impulsará a creación do Observatorio e o Rexistro galegos de acción voluntaria, recollidos na Lei que a Xunta está a tramitar neste ámbito
  • Fomentará o voluntariado para persoas maiores e con discapacidade, así como a educación non formal
  • O documento estratéxico inclúe, a diferenza de anteriores plans, un procedemento de avaliación para analizar se os resultados propostos se cumpren

Santiago, 5 de setembro de 2011.- A Xunta de Galicia vén de presentar hoxe o III Plan Galego de Acción Voluntaria 2011-2014, unha nova ferramenta coa que o Goberno galego pretende responder á realidade presente e aos retos que na actualidade o eido do voluntariado presenta na nosa comunidade autónoma.

A conselleira de Traballo e Benestar, Beatriz Mato, presentou hoxe o documento estratéxico en cuxa redacción participaron desde asociacións do eido social como Cogami, Cruz Vermella ou Cáritas ata colectivos ecoloxistas, universidades e concellos. Na súa redacción, en concreto, máis de 800 entidades do eido do voluntariado tiveron a oportunidade de realizar achegas a este documento, tal e como destacou Mato.

O plan inclúe un total de 89 accións para executar que se aglutinan en tres áreas de intervención- sensibilización, apoio e coordinación- e sete ámbitos para acadar obxectivos específicos: difusión; reflexión e estudo; promoción; formación; xestión; coordinación e cooperación. Cada un destes ámbitos serán desenvolvidos polas liñas estratéxicas do plan que suman 19 Entre as accións propostas, Mato destacou a aposta da Xunta neste plan polo voluntariado xuvenil. Neste eido, indicou que a comunidade autónoma de Galicia desenvolverá por primeira vez un programa de servizo de voluntariado xuvenil, que, de feito, anunciou que xa se está a executar.

En concreto, explicou que esta iniciativa conta cun orzamento de 90.000 euros e apuntou que na mesma están a participar 25 concellos e 36 entidades de acción voluntaria.

O programa consiste nunha plataforma para poñer en contacto ás persoas con vocación voluntaria e ás entidades que impulsan accións deste tipo, sexan asociacións, organizacións ou concellos. No primeiro ano da posta en marcha deste servizo novidoso, desde a Xunta estímase que se desenvolverán máis de 5.000 xornadas de actividades voluntarias en toda Galicia.

Ao respecto, a conselleira indicou que os participantes poderán obter nestas xornadas o certificado oficial de educación non formal, “polo que iniciamos así o necesario camiño do recoñecemento explícito destas actividades para incorporar ao currículo destas persoas”, subliñou.

Lei de Acción Voluntaria

Ademais da promoción do voluntariado xuvenil, Mato destacou outras medidas deste plan coas que se dan resposta ás actuacións contempladas na futura Lei de Acción Voluntaria, que comezará a súa tramitación parlamentaria no último trimestre deste ano.

Destacou destas accións a creación en 2012 do Observatorio Galego de Acción Voluntaria, que será un órgano de investigación e formación e establecerá sistemas de información e documentación. Terá como un dos principais obxectivos a realización dun estudo anual que actualizará a diagnose sobre acción voluntaria en Galicia. Así mesmo, a través deste plan tamén se porá en marcha o Rexistro de Acción Voluntaria de Galicia. Esta ferramenta recollerá o rexistro de entidades de acción voluntaria, que xa existe, e incorporará, como novidade, a posibilidade de que as persoas voluntarias poidan acreditar a través dun certificado oficial a súa experiencia e participación en programas ou proxectos de acción voluntaria. Desta forma, poderán certificar a súa experiencia de educación non formal adquirida.

Como órgano da acción voluntaria, manterase o Consello Galego de Voluntariado, que pasará a denominarse Consello Galego de Acción Voluntaria. Será un órgano de participación, coordinación, asesoramento e de consulta no que, como novidade, se dará máis protagonismo na súa composición ás entidades de acción voluntaria. En concreto, pasarán de ter de 6 a 8 vocais, aos que tamén suman outra vicepresidencia. A súa posta en marcha está prevista para 2012.

3.000 persoas en formación

Por outra banda, a conselleira fixo fincapé en outras medidas que inclúe o III Plan Galego de Acción Voluntaria 2011-2014 e que xa están en marcha como é o caso das accións destinadas á formación.

Neste sentido, Mato expuxo que “a Consellería de Traballo e Benestar seguirá a apostar pola educación non formal como viña a facer ata o de agora”. De feito, afirmou que o Plan de Formación 2011 posto en marcha este ano recolle un total de 28 accións diferentes, todas elas gratuítas tanto para os voluntarios como para as entidades de acción voluntaria. Este cursos, nos que están a participar máis de 3.000 persoas, son froito das propostas que en materia de formación nos achegan as propias entidades de acción voluntaria

O Plan tamén seguirá a fomentar o voluntariado de persoas maiores. A intención é a de promover a acción voluntaria entre as persoas deste colectivo, co fin de favorecer a participación social activa dos nosos maiores.

 

Por outra banda, o Goberno galego apoiará tamén a través desta ferramenta estratéxica, o voluntariado que desenvolven as persoas con discapacidade e ás entidades que desenvolven programas con este colectivo.

Outras accións que tamén inclúe o documento estratéxico que hoxe se presentou son: a colaboración entre as entidades e os centros educativos en proxectos concretos de acción voluntaria e en actividades de iniciación ao voluntariado; a promoción da participación do voluntariado como apoio nos grandes eventos sociais, culturais e deportivos que teñen lugar en Galicia; o impulso aos programas de voluntariado corporativo, como unha das liñas fundamentais dentro das políticas de responsabilidade social corporativa das empresas; a consolidación dun programa estable de voluntariado e educación medioambiental; o deseño dun programa estable de voluntariado para a difusión, coñecemento, protección e recuperación do patrimonio cultural galego; e, por último, a promoción da participación das persoas voluntarias en proxectos de voluntariado europeo.

Diferenzas con outros plans

Con respecto, ás diferenzas deste documento sobre plans anteriores, a titular do departamento autonómico explicou que o III Plan Galego de Acción Voluntaria (2011-2014) establece un procedemento de avaliación, mediante o cal se tratará de analizar se se teñen acadados os resultados propostos. Como criterios de avaliación tomaranse en conta a eficacia, eficiencia, calidade e a satisfacción das accións implementadas.

Por último, Mato indicou que con este plan contribuirase a promover a participación cidadá, a fortalecer as entidades de acción voluntaria, reforzar a coordinación entre os diferentes axentes e desenvolver estruturas para acción voluntaria, entre outros elementos que se consideran claves na promoción da acción voluntaria.

En definitiva, recalcou que “esta ferramenta supón unha nova planificación que se desenvolverá de aquí ao ano 2014” e incidiu en que foi un documento consensuado polos diferentes axentes da acción voluntaria en Galicia.

Polo tanto, atopámonos ante unha ferramenta completa e moderna, cuxo desenvolvemento permitirá dotar a Galicia dos mellores instrumentos para ordenar, impulsar e respaldar a acción voluntaria”, concluíu.

 

Acerca de Vgomagazine

Revista Online.

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión /  Cambiar )

Google photo

Estás comentando usando tu cuenta de Google. Cerrar sesión /  Cambiar )

Imagen de Twitter

Estás comentando usando tu cuenta de Twitter. Cerrar sesión /  Cambiar )

Foto de Facebook

Estás comentando usando tu cuenta de Facebook. Cerrar sesión /  Cambiar )

Conectando a %s

A %d blogueros les gusta esto: