A Fundación Novacaixagalicia e Gradiant comezaron as probas piloto dun anovador sistema de análise de afluencia de público

A Fundación Novacaixagalicia e Gradiant, o centro tecnolóxico de telecomunicacións de Galicia, puxeron en marcha a pasada fin de semana as probas piloto do sistema APC de análise de tráfico de persoas e afluencia de público en tempo real. A fundación galega puxo a disposición deste proxecto o auditorio do seu Centro Cultural de Vigo, onde se levaron a cabo estas primeiras experiencias de campo. Con esta aproximación, ambas as entidades dan un paso adiante no desenvolvemento desta tecnoloxía que permite coñecer cunha exactitude e inmediatez case totais a afluencia de asistentes a un local e fai, así mesmo, unha conta dos mesmos en tempo real. A tecnoloxía empregada trátase de sensores de vídeo en 3D, similares aos utilizados nos videoxogos de última xeración, emprazados na entrada do recinto, neste caso na entrada do auditorio.