O DOG PUBLICA AXUDAS QUE SUMAN 50,4 MILLÓNS DE EUROS PARA MELLORAR A EMPREGABILIDADE DE MÁIS DE 15.500 PERSOAS EN PARO

  • A directora xeral de Emprego e Formación, Ana María Díaz López, presentou hoxe as convocatorias destas liñas de subvención en materia de formación, obradoiros de emprego, programas integrais e orientación
  • Trátase só dunha parte de todo o investimento que realizará o Goberno galego no eido laboral ao longo deste ano
  • En formación priorizaranse os sectores máis innovadores, como a internacionalización, o emprendemento, a innovación e o desenvolvemento tecnolóxico
  • Os programas integrais primarán os proxectos de xestión compartida, e tamén incluirán criterios de puntuación para aqueles que se desenvolvan nas provincias de Lugo e Ourense, de acordos cos Plan Impulsa

Santiago, 10 de xaneiro de 2014.- O Diario Oficial de Galicia (DOG) vén de publicar catro liñas de axudas da Consellería de Traballo e Benestar que suman máis de 50,4 millóns de euros. As catro convocatorias refírense ao área laboral e pretenden mellorar a empregabilidade de máis de 15.500 persoas en paro. En concreto son accións de formación para persoas desempregadas, obradoiros de emprego, programas integrados de emprego e subvencións a técnicos de información, orientación e prospección de emprego. As tres primeiras accións publícanse hoxe no DOG e a  de orientación xa saíu o 31 de decembro.

 

A directora xeral de Emprego e Formación, Ana María Díaz López, presentou hoxe en Santiago estas actuacións do Goberno galego, que constitúen só unha parte de todo o investimento que realizará a Xunta en materia laboral ao longo de 2014. Deste xeito, ás actuacións xa publicadas no DOG sumaranse outras iniciativas destinadas á mocidade, á cooperación cos concellos ou aos autónomos, entre outras.

 

Con respecto ás catro liñas de subvencións presentadas hoxe, Díaz López afirmou que todas elas farán “especial fincapé naqueles colectivos con especiais dificultades de inserción”, como persoas con discapacidade, en risco de exclusión, ou mulleres vítimas de violencia de xénero.

 

En primeiro lugar, a directora xeral de Emprego e formación explicou as axudas referidas ao eixo da formación para persoas desempregadas, ás que se destinarán 30,3 millóns de euros para financiar 630 cursos. Díaz López sinalou que se continuará apostando por adecuar todos os cursos ás demandas do mercado laboral actual e, ademais, especificou que se seguirá vinculando case o 100 por cento das accións á obtención de certificados de profesionalidade, dando así cumprimento a un dos acordos do Diálogo Social.

 

Os cursos poderán ser solicitados por aqueles centros ou entidades debidamente acreditados e a previsión é que se poidan beneficiar deles máis de 9.500 alumnos.

 

Trátase só dunha parte da formación para 2014, xa que a directora xeral avanzou que ao longo do ano convocaranse novas actuacións nesta materia como, por exemplo, a formación para ocupados ou iniciativas dirixidas especificamente á mocidade.

 

Este ano, como principal novidade, estableceranse –de acordo coa normativa estatal- novas áreas prioritarias na impartición de cursos. Deste xeito, priorizaranse en toda Galicia as accións formativas relacionadas cos sectores máis innovadores, en concreto, aquelas que se centren na internacionalización, o emprendemento, a innovación e o desenvolvemento tecnolóxico. Como en anos anteriores, o alumnado que participe nestes cursos terá dereito a obter axudas en concepto de transporte, manutención e aloxamento. Os beneficiarios que teñan algún tipo de discapacidade ou que realicen un curso que forma parte do seu itinerario personalizado de inserción poderán acceder tamén axudas por asistencia.

 

Obradoiros de emprego

En segundo lugar, a responsable da área autonómica destacou a liña de axudas dirixida aos obradoiros de emprego á que se destinarán 10,2 millóns de euros. Estes programas mixtos combinan a formación co desenvolvemento dun traballo, e teñen unha duración de 6 meses. Os obradoiros poderán ser solicitados por entidades locais, por aqueles organismos que teñan competencias na promoción do emprego ou por consorcios. A previsión é que o próximo ano beneficien a 1.300 persoas co desenvolvemento de 50 obradoiros por toda a Comunidade autónoma.

 

Programas integrados de emprego

Ademais, o Goberno galego continuará apostando especialmente por programas integrados de emprego: actuacións transversais que combinan información, orientación, asesoramento ou formación. Todas estas iniciativas teñen un obxectivo de inserción mínima do 35 por cento dos participantes, que se prevén que sexan 4.500 este ano. As axudas poderán ser solicitadas por entidades locais ou sen ánimo de lucro. A este fin destínanse 5,4 millóns de euros, o que supón un 116% máis con respecto ao orzamento de 2013.

 

Cabe destacar que, por primeira vez, esta convocatoria incorporará criterios de puntuación específica para primar os proxectos de xestión compartida, e tamén para aqueles que se desenvolvan nas provincias de Lugo e Ourense, de acordo cos Plan Impulsa. Así mesmo, inclúese por primeira vez un número mínimo de accións individuais e colectivas para cada beneficiario.

 

Orientación

Por último, Díaz López referiuse ás axudas en materia de información, orientación e busca de emprego que se centrarán no financiamento da contratación ou prórroga de técnicos que se encargarán de realizar este asesoramento. Para este fin destínanse 4,4 millóns. A contratación poderá ser realizada por entidades locais e sen ánimo de lucro, e será por un período de 12 meses. Grazas a esta convocatoria, facilitarase a contratación de 231 técnicos especializados, que poderán prestar asesoramento a máis de 80.000 persoas, en colaboración co persoa propio do Servizo Público de Emprego de Galicia. En total, Galicia volverá a contar cunha rede pública de técnicos de orientación laboral composta por 462 profesionais.

About Vgomagazine

Revista Online.

Deja una respuesta

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Salir /  Cambiar )

Google photo

Estás comentando usando tu cuenta de Google. Salir /  Cambiar )

Imagen de Twitter

Estás comentando usando tu cuenta de Twitter. Salir /  Cambiar )

Foto de Facebook

Estás comentando usando tu cuenta de Facebook. Salir /  Cambiar )

Conectando a %s

A %d blogueros les gusta esto: