BENESTAR INCREMENTARÁ EN 2015 NUN 13,5% AS AXUDAS PARA PROXECTOS DE VOLUNTARIADO XUVENIL QUE CHEGARÁN AOS 500.000 EUROS

 A conselleira de Traballo e Benestar, Beatriz Mato, presidiu hoxe en Santiago o II Encontro da Rede de Centros Solidarios
 Preto de 1.400 alumnos de 13 centros de toda Galicia participaron este ano en proxectos solidarios, ben no propio centro ou en colaboración cunha entidade de voluntariado
 Mato avanzou que a Xunta lle dará continuidade a partires de 2015 ao Plan Galego de Acción Voluntaria

Santiago, 7 de novembro de 2014.- A Consellería de Traballo e Benestar incrementará o próximo ano as axudas a entidades locais e de acción voluntaria para proxectos de voluntariado xuvenil nun 13,5 por cento ata alcanzar os 500.000 euros.

Así o avanzou hoxe a titular do departamento autonómico, Beatriz Mato, en Santiago no II Encontro da Rede de Centros Solidarios. Esta iniciativa abre as portas do voluntariado aos mozos e mozas de Galicia e potencia ao máximo a súa vocación solidaria. Así, este ano participaron nesta actuación 1.383 alumnos e alumnas, de entre 13 e 18 anos, de 13 centros de Galicia, que realizaron de forma voluntaria proxectos solidarios no propio centro ou en colaboración cunha entidade inscrita no Rexistro de Acción Voluntaria de Galicia.

A conselleira destacou que o compromiso da Xunta co voluntariado non só se reflectirá en 2015 co aumento do orzamento neste eido, senón que explicou tamén que o Goberno galego lle dará continuidade ao Plan Galego de Acción Voluntaria 2011-2014, unha estratexia de presente e de futuro para promover o voluntariado na Comunidade galega. “Imos darlle continuidade cun novo documento, que abranguerá desde 2015 ata 2018, e buscará seguir dando resposta aos retos de futuro de todos os actores deste sector”, engadiu Mato.

A titular de Benestar sinalou, así mesmo, que a Xunta nos últimos anos mellorou o marco normativo do voluntariado en Galicia aprobando por unanimidade en 2011 no Parlamento de Galicia a nova Lei Galega de Acción Voluntaria. Mato indicou que un dos “grandes avances” tanto da Lei como do Plan Galego de Acción Voluntaria, foi acreditar de xeito oficial, a través dun historial persoal, as experiencias que os voluntarios e voluntarias adquiren durante o proceso de voluntariado.

Vantaxes da Rede de Centros Solidarios
Entre os beneficios da rede destacan a promoción entre os mozos e mozas da súa sensibilización coas situacións de vulnerabilidade, xa que o programa establece vínculos entre os centros educativos e as organizacións sociais de Galicia; a potenciación da educación non formal que promove valores como a responsabilidade, a participación, a creatividade, a tolerancia, a solidariedade, e ou traballo en equipo; e, por último, a mellora do currículum dos mozos e mozas, xa que os participantes da Rede de Centros Solidarios reciben un certificado acreditativo da acción realizada.