Curtocircuíto trae talento galego con Planeta GZ e Manolo González

O festival Curtocircuíto volve traer o mellor cine galego da tempada en formato curto, a través da súa sección competitiva Planeta GZ. A selección está composta de 10 títulos de xéneros e estilos diversos, que reúnen as mellores propostas de autor dos últimos meses. Amais, o certame segue apostando polo cine propio coa Carta Branca a Manolo González, importante docente cunha longa traxectoria nas aulas. O profesor fixo un programa de dúas sesións para o festival, no que se repasa a historia do cine galego a través dunha escolma de títulos emblemáticos.

O Teatro Principal acollerá o martes 6 de outubro os filmes galegos seleccionados. Na primeira sesión, inclúense os últimos dous traballos da documentalista Xisela Franco,Cruz Piñón, e Hyokakusha – Caminante sin rumbo, esta última asinada xunto a Anxela Caramés. Hai tamén espazo para a última ficción de Luis Avilés (Unary), cun excelente Antonio Durán Morris de protagonista; ou a nova animación de David Fidalgo,Preludio. Completa a sesión a ópera prima dunha da novas promesas do cine galego, Álvaro Fernández-Pulpeiro, que presenta Sol mihi semper lucet.

Na segunda, grandes referentes en Galicia do cine documental e experimental como Marcos Nine (Rorschach#1: Puntos de Autoridade), Miguel Mariño (O descubrimento de Américo) ou Jaione Camborda (Proba de axilidade), conviven coa novísima promesa da animación Borja Santomé (Historia Cerebro), ou co curioso encontro entre música e cine da banda coruñesa Volontè, cunha curta homónima na competición.

Manolo González presenta a súa historia do cine
A sala NUMAX acollerá o mércores 7 e o xoves 8 de outubro a Carta Branca de Manolo González, dedicada á historia do cine galego. Na selección que fixo para Curtocircuíto, inclúense obras xerminais do noso cine coma o documental Galicia, de Carlos Velo e Fernando G. Mantilla, un canto á nosa terra feito á altura da Segunda República;Mamasunción, o filme máis emblemático do grande renovador dos 80, Chano Piñeiro; ou varios títulos do recente Novo Cinema Galego: 1977 (Peque Varela), Os señores do vento (Xurxo Chirro) ou Ser e voltar (Xacio Baño), entre outros. González estará presente nas dúas sesións para falar dos detalles de cada película e discutir co público a súa escolma.