A XUNTA INVISTE 82.000 EUROS NA ADAPTACIÓN DE DÚAS SENDAS PEONÍS E CICLISTAS NA PO-244 AO SEU PASO POLO MUNICIPIO DE SOUTOMAIOR

• O delegado territorial da Xunta en Vigo, Ignacio López-Chaves, xunto ao alcalde do municipio, Agustín Reguera, supervisaron esta mañá o inicio das obras
• O presuposto da primeira senda que comezou esta semana ascende a 22.000 euros e o da segunda, que se iniciará nos vindeiros días, a 60.000 euros

 

Soutomaior, 13 de xullo de 2016.- O delegado territorial da Xunta en Vigo, Ignacio López-Chaves, xunto ao alcalde de Soutomaior, Agustín Reguera, supervisaron esta mañá o inicio das obras de execución de dúas sendas peonís e ciclistas na PO-244. A actuación, que leva a cabo a Axencia Galega de Infraestruturas (AXI) dependente da Consellería de Infraestruturas e Vivenda, consiste na adaptación das dúas sendas peonís e ciclistas duns 400 metros de lonxitude.

 

A primeira senda duns 230 metros aproximadamente e que vai do tramo 12+060 ao 12+290 ten adxudicado un presuposto de 22.185,37 euros. A estrada PO-244 xa conta cun tramo peonil e a intención é prolongalo a partir deste tramo coa creación dunha senda compartida para peóns e ciclistas, cunha sección mínima útil de 1,80 metros, ata a pasarela situada no acceso ao Colexio Santiago Apóstol.

 

Coma puido comprobar o delegado, os traballos nesta primeira vía comezaron esta mesma semana e contan cun prazo de execución de tres meses. Para levalos a cabo, en primeiro lugar, procederase á escavación da terra vexetal. Despois realizarase a demolición do pavimento existente e prepararase a superficie de asento. Pavimentarase a senda con formigón cor area, de 10cm de espesor, e completarase a obra coa colocación dos bordos de formigón. Por último, realizarase a sinalización e a formación de céspede na contorna.

 

As obras da segunda senda, de 150 metros de lonxitude, teñen previsto comezar este mesmo verán e contarán tamén cun prazo de tres meses para ser executadas. Neste caso as obras abarcarán do tramo 11+150 ao 11+300 da PO-244. O presuposto destinado a esta senda peonil e ciclista é de 60,000 euros e o procedemento de construción será similar ao do tramo anterior coa diferenza da lonxitude.

 

En definitiva, e coma recalcou o delegado, “trátase de actuacións de mellora da seguridade viaria dirixidas a peóns e vehículos” no municipio de Soutomaior onde se investirá en total máis de 82000 euros.

 

SAÚDOS,

GABINETE D