Archivo | mayo 20, 2017

V TRIATLÓN CONCELLO DO PORRIÑO

200 triatletas xa formalizaron a súa inscripción no V Triatlón Concello do Porriño

Aínda que o prazo de inscrición finaliza o vindeiro martes 23 ás 23.59 h, centos de participantes quixeron asegurarse a praza ao estar limitada a proba a 350 inscritos

O Mini Triatlón tamén ten limitada a participación a 45 inscritos (4-10 anos) xunto a un adulto


Conta atrás para a gran cita deportiva do municipio porriñés, a quinta edición do Triatlón Concello do Porriño, que se celebrará o vindeiro sábado 27 de maio.

A organización deste evento deportivo, que conta coa colaboración do Concello de Tui e a Comandancia Naval do municipio, dá estes días as últimas pinceladas técnicas á proba, que recupera as súas transicións orixinais ao contar cunha excelente previsión das condicións meteorolóxicas.

Deste xeito, ás 11.45 h do sábado 27, os protagonistas serán os participantes no Mini Triatlón, que acompañados sempre dun adulto, nadarán 25 m na piscina do Polideportivo Municipal para a continuación prepararse para a saída en bicicleta (12.00 h) ata a Igrexa de Santa María. Alí deixarán as súas bicis e prepararanse para tomar a saída en carreira (12.15 h) cara á Praza Arquitecto Antonio Palacios, onde lles espera a meta. O prazo para inscribirse finaliza o vindeiro venres 26 de maio, os interesados poden achegase á piscina municipal para formalizar a súa participación e moi importante non esquecerse do gorro, bañador, chanclas antideslizantes, casco, bici e ganas de pasalo ben.

Volvendo á proba absoluta, do mesmo xeito que nas anteriores edicións, o bocinazo de saída darase dende o porto deportivo de Tui; pero coa diferenza de que a primeira transición na que os triatletas collerán a bicicleta tras nadar 750 m no río Miño, este ano será no interior das instalacións da Comandancia Naval e non no área do embarcadoiro. 

A segunda transición volve a rúa Domingo Bueno, onde tralos 20 km de percorrido pola PO-342 que separan Tui de O Porriño, os triatletas deixarán as súas bicicletas para calzarse as súas deportivas e saír á carreira, ata completar os 5 km restantes de proba polo casco urbán e repartidos en 2 voltas. A meta estará situada diante do Concello do Porriño.

O prazo de inscripción permanecerá aberto ata as 23.59 h do próximo martes 23 e o seu custo é de 10 €, para os federados (cadetes gratis) e de 22 €, para os que fagan licenza dun día (10€+12€ -cadetes 6€-).

Dende a Federación Galega de Triatlón -FEGATRI- queren lembrar que este ano, se fará especial hincapé en sancións aos clubs, por cada participante que non se presente ao pódium na entrega de trofeos.

A XUNTA INSISTE NA COORDINACIÓN E NO TRABALLO CONXUNTO ENTRE ADMINISTRACIÓNS E ENTIDADES PARA PALIAR AS SITUACIÓNS DE POBREZA

O conselleiro de Política Social, José Manuel Rey Varela, clausurou a xornada sobre ‘Cooperación e axuda ao desenvolvemento: cultura e acción’ en Ferrol

 

  • O encontro serviu para compartir coñecementos e explorar sinerxías con respecto ás melloras da calidade de vida das persoas que máis o precisan
  • Estivo organizado pola Cátedra Jorge Juan da Universidade da Coruña

 

Ferrol, 19 de maio de 2017.- O conselleiro de Política Social, José Manuel Rey Varela, participou hoxe na clausura da xornada sobre Cooperación e axuda ao desenvolvemento: cultura e acción celebrado en Exponav, Ferrol. O encontro serviu para compartir coñecementos e explorar sinerxías con respecto ás melloras da calidade de vida das persoas que máis o precisan e para avanzar nun traballo coordinado entre entidades, institucións privadas e administracións públicas.

 

O congreso contou coa participación de doutores e técnicos que traballan para contribuír á erradicación da pobreza e a fame no mundo e para axudar á construción activa da paz. Trátase de obxectivos xerais que comparten coa Xunta de Galicia. “A loita contra as situacións de desigualdade e de pobreza é un elemento transversal e absolutamente prioritario para o Goberno autonómico”, explicou Rey Varela durante a clausura.

 

Hoxe Galicia presenta unha taxa de risco de pobreza menor que antes da crise. “A evolución é positiva pero aínda queda moito por facer para seguir avanzando na erradicación da pobreza”, afirmou o titular autonómico. Para conseguir esta meta, a Consellería de Política Social traballa a través da Estratexia de Inclusión Social de Galicia 2014-2020, unha folla de ruta que busca evitar a transmisión da pobreza entre xeracións a través de novos enfoques e metodoloxías na intervención coas persoas e familias.

 

Así mesmo, Rey Varela lembrou que a Administración autonómica tamén traballa coa Rede de Loita contra a Pobreza (EAPN), na elaboración e desenvolvemento da Axenda Social de Galicia, que formula respostas adaptadas ás novas características de pobreza derivadas dos cambios estruturais que experimenta a sociedade actual.

 

O conselleiro finalizou a súa intervención insistindo na importancia do fomento da colaboración entre as administracións con competencias en materia social. “Só coa suma de esforzos de todos e todas e co desenvolvemento de políticas integrais que permitan paliar os efectos da exclusión e da pobreza, e atacar as causas que a provocan, poderemos poñer fin á mesma”, concluíu Rey Varela.