REY VARELA ABORDA CO ALCALDE DE LEIRO A MELLORA DOS SERVIZOS DE ATENCIÓN AOS MAIORES COA PRÓXIMA APERTURA DO CENTRO DE DÍA

O conselleiro de Política Social mantivo hoxe en San Caetano unha xuntanza de traballo co rexedor do municipio ourensán, Francisco José Fernández Pérez

O conselleiro de Pol’tica Social, JosŽ Manuel Rey Varela, manter‡ un encontro co alcalde de Leiro, Francisco JosŽ Fern‡ndez PŽrez.

• O responsable da área Social do Goberno galego destacou o incremento das horas dispoñibles no Servizo de Axuda no Fogar a persoas maiores dependentes

 

Santiago, 31 de maio de 2017.- O conselleiro de Política Social, José Manuel Rey Varela, continúa a manter encontros periódicos cos rexedores e rexedoras de Galicia co obxectivo de poñer en común e avaliar tanto os programas como os servizos no ámbito social. Así, na xornada de hoxe Rey Varela entrevistouse no seu despacho de San Caetano co alcalde do concello de Leiro, en Ourense, Francisco José Fernández Pérez.

 

Os dous mandatarios abordaron a situación da a atención persoas maiores neste municipio pertencente á comarca ourensán do Ribeiro. Nesta liña, acordaron continuar coa colaboración entre administracións para axilizar os trámites e abrir tan pronto como sexa posible ao longo deste ano o novo centro de día para persoas maiores, que ten unha capacidade máxima de 50 prazas e cuxa construción supuxo un investimento algo superior ao millón de euros. Ao respecto, Rey Varela destacou a importancia que terá este equipamento para “promover e facilitar que os nosos maiores teñen un punto de encontro e manteñan un estilo de vida activo a través da organización de actividades  e talleres orientados a conservar e potenciar as súas capacidades intelectuais, físicas e creativas”.

 

No que atinxe ao coidado das persoas maiores e dependentes, a Consellería de Política Social vén de incrementar o número de horas no Servizo de Axuda no Fogar (SAF) dos concellos que forman parte da Mancomunidade do Ribeiro, entre eles o de Leiro. Este aumento de horas no servizo foi do 5%, o que permite chegar a unha ratio de atención por  riba do 93%. “O obxectivo é conseguir todas as melloras posibles na calidade de vida das familias e das persoas dependentes, para o que continuamos a incorporar de maneira progresiva a máis persoas aos diferentes servizos que integran o sistema autonómico de atención”, indicou Rey Varela.

 

Por último, Rey Varela e o rexedor de Leiro manifestaron a súa vontade de seguir afondando nas liñas de colaboración entre as dúas administracións co compromiso de buscar conxuntamente unha política social axeitada que se adapte as necesidades da devandita localidade.