Segunda parte tempada de clásica Afundación en Vigo

Afundación presenta a súa segunda parte da tempada de música clásica en Vigo, que ofrece ao espectador obras de Dvorak, Brahms, o Chaikovski, entre outros. A Real Filharmonía de Galicia e a Orquesta Sinfónica de Galicia estarán dirixidas por Maxim Emelyanychev, Jonathan Webb, Giovanni Antonini e Eliahu Inbal. 

Os abonos estarán dispoñibles a partir de mañá, 1 de decembro, e ata o día 2, para todas aquelas persoas que xa estiveron aboadas durante a pasada tempada. A partir do día 3 dese mes, e ata o día 5 de xaneiro, actívase a venda de abonos, para a primeira parte ou para a tempada completa, mediante as canles habituais de comercialización de espectáculos da entidade: a web de Ataquilla.com e o teléfono 902 504 500. Ademais do aforro que supón o abono, un 20 % con respecto aos prezos dos billetes individuais, a fundación galega ten en marcha unha política de bonificacións e descontos para persoas desempregadas, xubiladas e mozas que supón unha rebaixa adicional dun 10 % no prezo dos abonos. Afundación continuará o vindeiro curso co programa «Quedamos no palco, quedamos coa clásica», unha iniciativa que pon á disposición dos escolares entradas gratuítas co fin de potenciar este tipo de música entre os máis novos. Ademais, os menores de 35 anos poden beneficiarse dun prezo moi reducido, de 5 euros, presentándose na billeteira 30 minutos antes do comezo do concerto, caso de que as entradas non estean esgotadas. Todas as funcións terán lugar no Teatro Afundación de Vigo, na rúa Policarpo Sanz, 13.